蘋果日報 2013-11-26
隔牆有耳：驚行政立法打龍通 咖喱范要封立會秘道
高登男神范國威早前借出立法會議員專用浴室畀留守政總嘅港視十壯士洗白白，搞到俾立法會行管會警告。男神諗住趁呢次機會，將個火頭燒埋去班建制派早前透過立法會「秘密通道」敗走一事，要求立法會應該以混凝土，「永久封閉」呢條通往政府總部嘅鬼祟通道。
范國威日前去信立法會行管會主席曾鈺成，表明呢條通道將立法會同政府總部連接起嚟，令行政機關可以直入立法會，令到「會議廳範圍」變得含糊不清。咖喱范話，查實家陣立法會議員大樓同辦公室，各有一個議員入口同公眾入口，即係共有四個出入口，將來仲會有多個行人天橋接去中信大廈嘅出入口，前前後後有五個「逃生位」。即使群情洶湧，議員要搵路走，都有好多選擇，根本冇需要保留呢條凸顯行政立法「融合」嘅秘道。
浴室健身室超豪裝
咖喱范寫信前都去過踩線㗎，呢條秘道由立法會停車場一開閘，就可以直通政府總部西翼走人，但要打開通道閘門，都要事先通知政總囉。噢，咁即係，當日保皇黨着草，政府總部有人配合「營救」啦！除咗要求「封路」，咖喱范仲提供咗立法會議員專用浴室同健身室嘅相片畀大家開吓眼界，個浴室同健身室設備同裝修，拍得住豪宅會所㗎！其實立法會職員專用嗰個健身室仲正呀，前面係落地大玻璃，對住維港㗎！
pf_lee@appledaily.com
Search